2019-yil 19-mart kuni “Qizilqir” saylgohida “Assalom Navro‘zi olam” nomli bayram sayli tantanalari o‘zgacha tarzda bo‘lib o‘tdi. Bayram sayli tantanasini tuman hokimi A.Mustanov tabrik so‘zi bilan ochib berdi va tumanimiz ahlini “Navro‘z” tantanasi bilan tabrikladi.
“Navro‘z” umumxalq bayrami munosabati bilan tuman Madaniyat bo‘limining teatrlashtirilgan “Assalom Navro‘zi olam” nomli katta bayram konsert dasturi tayyorlanib tuman aholisiga namoyish etildi. Tomosha dasturida uyg‘onish fasli bo‘lmish bahor faslining kelganini aks ettiruvchi “Ko‘klam keldi, Navro‘z keldi” kompazitsiyasida gullarga burkangan bahor faslining chiqishi, “Yurtimda Navro‘z sayli” teatrlashtirilgan musiqali tomosha dasturida esa “Kichkintoy” xalq xavaskorlik qo‘g‘irchoq teatri ijrosidagi qo‘g‘irchoqlarning chiqishlari namoyish etilgan bo‘lsa, “Ona Vatan dilbandlari” dasturida madaniyat markazlarida tashkil etilgan badiiy xavaskorlik to‘garaklar ishtirokchilarining bahor va bolalikni tarannum etuvchi qo‘shiqlari ijro etildi.
Shuningdek dastur davomida “Ko‘xna zamin ohanglari” dasturi orqali “Tog‘ shalolasi” va “Parvoz” ashula va raqs xalq ansamblining milliy ashulalardan tuzilgan “Bog‘ aro”, “Jamoling”, “Safti suvora” va “Segoh uforisi” kabi popurri qo‘shiqlar va raqslari hamda “Tillarda doston Navro‘zim” tomosha dasturida tumanda samarali ijod qilayotgan “Bog‘don gullari” folklor etnografik xalq ansamblining xududga xos qadimiy marosimlaridan “Dervishona” va “Urug‘ qadash marosimi” namoyish etildi.
Tumandagi xavaskor qo‘shiqchilar S.Ibragimov, A.Keldiyev, Yu.Temirov, B.Usmonov, S.Keldiyev, J.Rustamov, B.Ismoilov, M.Ahmedov, A.Qozoqovlar tomonidan sevimli xalq qo‘shiqlari ijro etildi. “Navro‘z” sayli tomoshalari davomida Farg‘ona viloyatidan tashrif buyurgan “Ahror dorboz” guruxi dorbozchilari tomonidan namoyish etilgan dorbozlik san’ati tomoshalari, hamda poytaxt Toshkentdan taklif etilgan estarda xonandalari Farhod va Shirin dueti va Xorazm viloyatidan tashrif buyurgan xalfachilik san’ati vakillari ijrosidagi kuy qo‘shiqlar tumanimiz axolisiga birdek manzur bo‘ldi.